Gipaslak-subli sa prisohan ang tolo sa unom ka Person Under Police Custody (PUCP) nga unang mipuga sa selda sa Puerto Police Station 6, Barangay Puerto, ning syudad, kagahapon. Gikompirmar kini sa Cagayan de Oro City Police Office (COCPO) sa BOMBO RADYO.
Namahayag si COCPO Spokesperson Police Captain Emelita Simon nga nagmalampuson ang ilang man hunt operation dihang nakabalik na ang tolo sa nipuga ug kasamtangang gipangita ang laing tulo nga adunay kasong pagpayuhot sa ilegal nga druga ug attempted rape.
Lakip sa gi-imbestigaran kung tinood ba ang report nga adunay bata nga gisugo sa mga piniriso nga mukuhag gabas, asin ug suka nga maoy gigamit aron muhumok ang puthaw.
Nanawagan ang COCPO sa pamilya ug nakaila sa laing tolo ka naka-ikyas nga ereport sa kapulisan kay delikado nga mga kaso ang ilang gi-atubang.
