CAGAYAN DE ORO CITY-Gipaubos karon sa PNP sa ilang kustodiya ang tulo ka kabanay sa mga Parojinog nga dunay giatubang nga mga kasong kriminal sa korte sa Ozamiz City.
Kini human unang nasikop pinaagi sa warrant of arrest ang magtiayong resigned Ozamiz City Councilor Rizalina Ozamiz-Francisco ug Manuelito Francisco ingon man ang ilang anak nga si June Francisco sa San Fernando,La Union sa
Abril ning tuiga.
Miingon si Ozamiz City Police Office commander Supt Jovie Espenido nga temporaryo una sila ma-detain sa city jail
samtang wala pa gimando sa korte suprema nga ibalhin ang ilang mga kaso sa kauluhan.
Si Rizalina ang igsoon sa kapikas sa founder sa Kuratong Baleleng Gang nga si Octavio Parojinog Sr nga responsable sa dagkong mga kremin sa nasud sugod tuig 1986 hangtod 2008.
Gitudlo usab si Manuelito nga lider sa Dragon Francisco Organized Group nga utok sa dagkong kremin sa Misamis
Occidental.
Samtang nabalaka sa ilang kinabuhi ang magtiayong resigned Councilor Rizalina Ozamiz ug Manuelito Francisco diin sila gidala sa kustodiya sa PNP gikan sa La Union.
Kini human sila personal gikuha ni Espenido tungod sa kasong illegal possession of firearms,explosives ug double murder case nga pending sa korte sa maong lugar.
Miingon si Gng Francisco nga walay kasiguruhan ang ilang seguridad kon anaa sila sa kustodiya ni Espenido.
