CAGAYAN DE ORO CITY – Samaran ang tulo ka trabahante dihang nahugno nga covered court nga proyekto ni Cagayan de Oro 1st District Rep Rolando ‘Klarex’ Uy diha sa Zone 1 Punta Bonbon, Brgy Bonbon ning syudad.
Naila ang mga biktima nga sila si Wilson Berja, 27-anyos, minyo; Arjel Gallana, 22-anyos, minyo ug Ronnie Miñoza, 26-anyos, minyo pulos taga Salay,Misamis Oriental.
Gibutyag ni Bonbon Brgy Kag Lope Matildo miingon nga nahitabo ang aksidente dihang gitapok sa mga trabahante sa tunga nga bahin sa atop ang materyales nga ilang gamiton.
Gidala sa ospital ang mga biktima ug anaa na sa luwas nga kahimtang.
Dugtong usab niini,nangayo’g pagsabot si Cong Klarex ilabina nga pinakauna kining higayon nga may tinukod nga covered court ubos sa DPWH design nga kalit nahugno.
Miingon si Klarex nga hayan nahugno kini tungod sa epekto sa sunod-sunod nga paglinog sa Mindanao diin kusog nga intensities ang nabati sa dakbayan sa miaging semana.
Samtang nagtoo ang usa sa construction workers nga naapektuhan sa sunod-sunod nga linog ang covered court nga ilang gitukod hinungdan nga nahugno ning syudad.
Miingon si Anilson Rasala nga wala nila mabantaye ang mga liki hinungdan nga nahugno kini ug nadat-ugan sa debris sama sa tubo ang tulo niya ka kauban hinungdan nga nakaangkon sa nagkadaiyang samad sa kalawasan.
Hisayran nga moabot sa P6-million ang kantidad sa gitukod nga covered court.
