(Update) CAGAYAN DE ORO CITY – Gitay-og sa magnitude 5.9 nga linog ang dakong bahin sa Mindanao kagabii.
Miingon si Philvocs regional director Marcial Labininay nga nagsumikad ang epesentro sa linog sa lungsod sa Kadilingilan,Bukidnon diin may ginlawmon nga 5 kilometros ug tectonic in origin.
Giangkon ni Labininay nga sa maong kakusog,nakahatag kini’g dagkong damyos sa mga lugar nga naagian sa linog.
Subay usab sa ilang record,nakasinati sa intensity 6 ang Kadingilan, Kalilangan, Don Carlos, Maramag, Kitaotao ,San Fernando, Bukidnon.Gitay-og usab sa intensity 5 ang Damulog, Talakag and Valencia City, Bukidnon; Midsayap, Cotabato; Kidapawan City ug Marawi City.Samtang naghatag usab sa pagkayagaw sa katawhan ang intensity 4 – Impasugong,Malaybalay, Bukidnon; Malungon, Sarangani; Antipas, Cotabato,Rosario, Agusan Del Sur; Cotabato City; Davao City; Koronadal City; Cagayan De Oro City.
Nabati usab ang intensity 3 sa Malitbog, Bukidnon; Tupi, South Cotabato; Manticao, Misamis Oriental; Tubod,Bacolod, Lanao Del Norte; Alabel, Sarangani; Gingoog City; Pagadian City; Iligan City.Gibati usab sa katawhan ang intensity 2 – Polomolok, Lake Sebu and Tampakan, South Cotabato; Kiamba, Sarangani;Mambajao, Camiguin; Sindangan and Polanco, Zamboanga Del Norte; Molave, Zamboanga Del Sur; Dipolog City; General Santos City samtang intensity 1 lamang sa Zamboanga City.
Dugtong niini,dili ti-aw ang kahadlok nga gibati sa trabahante sa pribadong kompanya nga naka-check in sa ika-22 nga andana sa Centrio Tower diha sa Corrales Avenue ning syudad kagabii.
Kini human tay-uga sa intenstiy 4 ang syudad epekto sa magnitude 5.9 magnitude nga linog nga unang mihapak sa lungsod sa Kadingilan,Bukidnon.
Miingon si Aldritch Tan nga taga- Iligan City nga nakatabang kaniya’g dako ang mga impormasyon gikan sa mga karadyohan kabahin sa angay buhaton kon dunay paghapak sa mga linog.
Gani,pipila sa mga gamit sulod mismo sa kuwarto nga iyang gisak-an ang nangatumba gumikan sa kakusog sa linog.
Si Tan ang kabahin lamang sa gatusang tawo nga nakagawas gikan sa pipila ka high rise buildings nga naglakip sa mga hotel sa Seda ,New Dawn ,Luxe Hotel,Red Planet ug bisan sa pampubliko ug pribadong mga opsital ning syudad kagabii.
Samtang gihupay ni CDRRMD head Nick Jabagat ang kabalaka sa posibleng mga kadaot sa mga tag-as nga gambalay nga apektado sa magnitude 5.9 magnitude nga linog sa syudad kagabii.
Miingon si Jabagat nga gilayon nila gisusi ang mga gambalay nga kanhi na naigo sa mga linog niadtong Oktubre ning syudad diin walay nakit-an nila nga natala nga kadaot niini.
Apan gibutyag ni Jabagat nga mohimo’g dungan nga inspeksyon ang city engineering ug office of the building official sa syudad ning adlawa aron pagsuta kon may mga nadaot epekto sa maong linog.
Samtang guuba ang halos tanang mga balay sa usa ka barangay sa Kadingilan epekto sa 5.9 nga linog kagabii.
Kini ang gikompirmar ni Kadingilan Local Disaster Risk Reduction Management Officer Sheen Therese Romo sa pakighinabi sa Bombo Radyo.
Gitumbok ni Romo nga maoy grabeng nakasinati sa linog ang ang Brgy Sibongan sa maong lungsod.
Miingon si Romo nga nangliki ug nangabuak usab ang samin sa munispyo ug Barangay Hall sa Poblacion,salog sa ilang simbahan ug ang ilang police station.
Gikompirmar usab niini nga may nakuyapan nga estudyante sa Bukidnon State University dihang natagakan sa debris, samaran ang laing usa nga natumbahan sa balay ug may na trauma usab tungod sa linog.Dali ng gidala sa ospital ang mga biktima.
Samtang kanselado ang tanang klase sa tibuok Quezon,Kadingilan ug ValenciaCity,Bukidnon ning adlawa.
Kini ang gikompirmar ni Mark Butanas, communication incharge sa Quezon Municipal Disaster Risk Reduction Management Office.
Miingon si Butanas nga gihimo sa lokal nga pangagamhanan ang kanselasyon sa klase aron mahatagag higayon nga masusi ang tanang mga tunghaan kung may kadaut ba nga nahatag sa nahitabong 5.9 magnitude nga linog kagabii.
Gipahimangnuan na lamang ang tanang taga Quezon nga motaho sa buhatan kung may nasiplatang kadaut sa ilang palibot.
