Nagpahamtang si Colombian President Gustavo Petro og 30% nga pagpaubos sa sweldo sa mga miyembro sa Kongreso pinaagi sa pagtangtang sa “bonus para sa espesyal nga serbisyo.”
Ang lakang mahimong epektibo sa Hulyo, human sa eleksyon.
Tungod niini, ang kita sa mga lehislador nahulog ngadto sa $9,400 kada bulan, samtang kadaghanan sa mga trabahante sa nasud nagdawat lamang og $500 o ubos pa.
Sumala sa gobyerno, ang desisyon makatabang aron itugma ang kita sa mga lehislador sa tinuod nga ekonomikanhong realidad sa Colombia.
Apan gisaway kini sa uban nga opisyal nga nag-ingon nga kini usa ka paagi sa pagpangsilot sa mga miyembro sa Kongreso. Sa laing bahin, gipangandaman usab sa gobyerno ang pagtaas sa national budget og $4 bilyon karong tuiga.
Ang dugang nga pondo igahin alang sa health insurance, fuel subsidies, ug mga proyekto sa infrastruktura nga nagpalig-on sa seguridad sa nasud. (Jane Abulag)
