Mitug-an si kanhi DPWH Bulacan First District Engineer Henry Alcantara sa Sandiganbayan nga 30% ra sa pondo para sa flood control projects ang aktwal nga nagamit tungod sa daghang deductions sama sa komisyon, royalties, buwis ug retention fees.
Siya miingon nga sa P100 alokasyon, 30% hangtod 35% lang ang nabilin alang sa implementasyon ug ang mga proponent nakadawat ug 30% samtang ang mga kontraktor 3%.
Personal usab siyang nakadawat ug 1.5% hangtod 2% nga komisyon.
Gi-klaro ni Alcantara nga kini nga scheme limitado lang sa flood control projects ug sa uban pang imprastruktura, 70% ang aktwal nga nagamit.
Mitestigo usab siya nga naghatod siya ug P1.75 bilyon hangtod P1.8 bilyon kang kanhi DPWH USec. Roberto Bernardo, apan wala kini nakadawat sa bahin sa proyekto.
Gitumbok niya si kanhi Senador Ramon Revilla Jr. isip proponent base sa verbal instruction, apan wala siyay pruweba nga nakadawat kini sa bayad ug gipanghimakak ni Revilla ang alegasyon sa kickback.
