Tinguha sa mga trabahante sa Sanjia Steel Plant nga ihatag kanila ang lima ka tuig nga benepisyo ug ang katapusang suhulan sa petsa 20 sa Mayo ning tuiga.
Sa exclusive interview sa BOMBO RADYO, namahayag si Albert Castro nga maayo ang dagan sa ilang trabaho ug but-an ang ilang mga insek nga amo.
Iyang gikompirmar nga wala sila masayud kung adunay ilegal nga kalihukan sa planta, apan sa naglabay nga mga katuigan daku ang ilang nadawat nga sweldo.
Panawagan sa grupo ni Castro sa gobyerno nga ihatag kanila ang igong benepisyo kung hingpit ipasira ang planta nga nakabase sa PHIVIDEC Industrial Estate, Tagoloan, Misamis Oriental.
Gibutyag ni Castro nga tag-₱20,000 ang ilang suhulan kung makompleto ang 30 ka adlaw nga pagtrabaho, apan wala silay madawat kung muliban tungod sa patakaran nga “no work, no pay.”
Gisayangan sa grupo sa posibilidad nga mapasirad-an ang planta tungod kay duol na ang ting-eskwela ug wala na silay ikahatag nga materyales sa pagtungha sa ilang mga anak.
Tungod sa pagronda sa mga otoridad, kapin 300 ka trabahante ang mawad-an sa trabaho pagsulod sa bulan sa Hunyo ning tuiga.
