CAGAYAN DE ORO CITY – Gihikay na ang kasong paglapas sa Dangerous Drugs Act of 2002 kon kasupakan sa RA 9165 batok sa usa ka drug pusher nga napalitan sa tag usa ka libo matag pakete sa shabu sa Zone 12, Brgy. Sta Cruz, Tagoloan, Misamis Oriental.
Giila ni Police Lt. Ramil Langala, OIC station commander sa Tagoloan Municipal Police Station ang suspek nga si Philip Villablanca, DI Listed, 32 anyos ug residente sa Brgy. Zone-8 Bugo ning syudad.
Human maposasan sa mga pulis, nakuha pa sa bulsa sa suspek ang laing mga pakete sa shabu nga dili muminos sa P30,000 ang street Value.
Gibutyag sa mga otoridad nga gihimo nila sa alas 2:40 sa kadlawon ang operasyon tungod sa ka-idlas sa suspek. Sa pagkakaron, detenado na ang drug pusher sa selda sa Tagoloan MPS.
