Namatay ang labing menos 33 ka tawo ug naangol ang lain pang 39 ka indibidwal human giingong gibombahan sa mga eroplano sa Saudi Arabia ang usa ka baryo sa Bani Hushaysh, usa ka lugar nga kontrolado sa Houthi sa sidlakan sa Sanaa, kapital sa Yemen.
Sumala sa Houthi-run Saba News Agency, mga balay sa mga sibilyan ang naigo sa maong pag-atake ug kadaghanan sa mga namatay kay mga babaye ug bata.
Gipahayag sa direktor sa Sehatuna Hospital nga adunay mga tawo, lakip ang mga tigluwas, nga naipit sa nangaguba nga mga balay, samtang adunay mga medical responder nga namatay sa giingong balik-balik nga pagpamomba samtang nagpadayon ang operasyon sa pagluwas.
Sa laing bahin, gipahibalo sa Center for International Communication sa Saudi Arabia nga ilang giimbestigahan ang maong taho, samtang kapin sa 200,000 na ka tawo ang napapahawa sa ilang mga pinuy-anan sukad nga mibalik ang panagbangi tali sa Saudi Arabia ug mga Houthi niadtong bulan sa Hulyo, sumala sa International Organization for Migration (IOM). (raniel mahunyag)
