CAGAYAN DE ORO CITY – Nakiglimbasog pa sa iyang kinabuhi ang 34 anyos nga lalaki nga gipusil sa tulo ngadto upat ka mamumuno sulod sa ilang balay sa lungsod sa Tagoloan,Misamis Oriental kaganihang kadlawon.
Subay sa Bombo Radyo news team, giila ang biktima nga si Steven Taca-Taca,may kaipon ug nagpuyo sa maong lungsod.
Saysay sa igsoon niini nga si Alvin Taca-taca nga kalit lang sila gisudlan sa wala ilhing mga responsable diin namusil sa biktima hinungdan nga nahiagom sa pipila ka igo sa lawas.
Kini ang rason gidala pagdali sa Northern Mindanao Medical Center diin gikataho nga talandugon ang kahimtang.
Saysay pa niini nga maglisod sila’g ila sa mga armadong lalaki kay naka-helmet ug nakasul-ob sa jackets dihang nangantake.
Namugos usab kini nga tarong nga pagkatawo ang biktima diin bisyo sa inom ug sigarilyo lang ang kalingawan niini.
Gihimuan pa sa dugang imbestigasyon sa Tagoloan Police Station ang hitabo.
Hisayrang sa miaging semana,adunay usa ka lalaki nga gipusil-patay usab sa wala mailing mga responsable diin gidudahan nga epekto sa gidiling droga ang rason niini.
