Wala pasagdi sa lokal nga kagamhanan sa Brgy Lapasan ang apektadong pamilya sa 34 ka mga balay nga nasunog sa Sitio San Roque, Barangay Lapasan.
Namahayag si Barangay Lapasan Risk Reduction Management Officer Aldrin Vaquilar nga muabot sa 37 ka pamilya o 182 ka indibidwal ang ilang naapuran sa food ug non-food items ug sila kasamtangang nagpasilong sa Lapasan Covered Court, isip temporary shelter.
Gipamugos ni Vaquilar nga organisado ang ilang sistema sa pag-apud sa pagkaon ug hinabang.
Hinoon, gitagaan nila’g bug-at nga bili kadtong pamilya nga tapot lawas ra ang nadala ug walay nasalbar nga kabtangan kay hurot gilamoy sa kalayo ang ilang balay.
Gikompirmar usab sa opisyal nga nadawat na nila ang ayuda gikan sa City-LGU. Sa pagkakaron, gipalawoman pa ang imbestigasyon sa hinundgan sa sunog.
