CAGAYAN DE ORO CITY – Nagsaka pa sa 373 ka pamilya ang apektado gikan sa unom ka lungsod nga apektado sa 5.9 magnitude nga linog sa Bukidnon.
Kini human dunay 27 ka balay nga hingpit nga nangaguba samtang gatusan ang nakaangkon sa pagpangliki hinungdan nga napugos pagtukod sa tents sa kahadlok nga mahugnuan kon subli mitay-og ang linog.
Miingon si Bukidnon Provincial information officer Hanzel Echavez nga anaa usab sa 11 ka tawo ang samaron nga nadala sa ospital apan luwas na sa peligro nga kahimtang.
Kabahin sa grabeng apektado sa linog ang mga lungsod sa Kadingilan,Maramag, Don Carlos, Dangcagan, Kitao-tao ug Talakag diin nagsumikad usab ang mga residente nga samaron.
Ipadayon sa inspection teams ang paglibot sa maong mga lungsod aron makuha ang balor sa structural damage nga aron i-submitar kang Bukidnon Gov Jose Maria Zubiri.
