Gipanguluhan ni Presidente Ferdinand Marcos Jr., ang pagtunol sa mukabat 387 ka mga Patient Transport Vehicles (PTVs) alang sa pito ka rehiyon sa Luzon.
Kini nga proyekto maoy tipik sa programa ug saad ni Presidente Marcos kuyog ang Philippine Charity Sweepstakes Office (PCSO) sa pagpalapad sa serbiyo sa panglawas ug mapadali ang tubag sa mga emerhensiya sa nasud.
Gipresentar ang gatusang mga sakyanan sa simpli nga seremonya nga gipahigayon sa Quirino Grandstand, Manila, karong buntag.
Ang mga PTVs gitakdang ibiyahe padulong sa Region I (Ilocos), Region II (Cagayan Valley), Region III (Central Luzon), Region IV-A (CALABARZON), Region IV-B (MIMAROPA), Region V (Bicol) ug sa Cordillera Administrative Region (CAR).
Subay sa mando sa Presidente, ang distribusyon nakalatid sa Medical Transport Vehicle Donation Program (MTVDP) sa PCSO, nga gituyo aron makatabang sa mga Local Government Units (LGUs) ug hospital, ilabi na kadtong naa sa kabus ug delikado nga komunidad, aron makabaton sa sakyanang-medikal nga gikinahanglan sa oras sa emerhensiya.
Ang matag PTV adunay mga gamit nga pangmedikal sama sa stretcher, oxygen tank, blood pressure monitor, ug ubang mga suplay aron masiguro ang luwas ug tukmang pagdala sa pasyente padulong sa ospital.
