CAGAYAN DE ORO CITY – Mag-atubang sa kasong pagsupak sa Dangerous Drugs Act of 2002 ang upat ka personalidad nga nadakpan sa magkalahing buy bust operation sa kapolisan sa lungsod sa Tagoloan,Misamis Oriental.
Namahayag si Police Regional Office 10 spokesperson Police Maj Joann Navarro nga unang milusad sa operasyon ang tropa sa Regional Police Drug Enforcement Unit 10 batok sa tulo ka residente nga taga-Poblacion,Datu Piang,Maguindanao nga misulod pagtuyo sa Northern Mindanao aron magpayuhot sa ilegal nga droga.
Nadakpan sa RDEU 10 operatives ang mga suspek nga sila alyases Candao,Norman ug Dove nga pulos hingkod ang edad nga nakig-transaksyon sa kontrabando sa Zone 8,Barangay Casinglot sa miaging adlaw.
Nabawi sa mga operatiba gikan sa mga suspek ang 13 ka sachets sa gitoohang shabu nga gatos gramos ang timbang nga mibalor sa 680-mil pesos,marked money,celphone ug ubang paraphernalia.
Dugang ni Navarro nga nasakote usab sa intelligence operatives sa Tagoloan Police Station ang first timer apan dugay na sa kalihukan nga si alyas Boy Solo sa bulag nga operasyon sa Zone 1,Nabulod,Brgy Baluarte.
Nakompiskar usab ang gatos gramos sa gitoohang shabu nga dunay kantidad gihapon nga 680-mil pesos,buy bust money ug ubang ebedensiya.
Dugtong niini,gidayeg ug gipasalamatan ni PRO 10 Director Brig Gen Ricardo Layug Jr ang ilang tropa nga walay pagkaluya pagsumpo batok ilegal nga droga aron malikay ang katawhan sa ilegal nga bisyo.
Nanganti usab kini nga walay hunong ang operasyon sa kapolisan hangtod nga masignit ang dagkong mga utok sa sindikato nga migamit sa katawhan.
