CAGAYAN DE ORO CITY-Nasikop sa kapolisan sa magkalahi nga higayon ang tulo ka suspected drug pushers nga gilakipan sa duha ka babaye ug lalaki diha sa dalang Yacapin-Velez Streets sa syudad.
Gibutyag ni Carmen Police Station deputy station commander Sr/Insp Mario Mantala Jr nga maoy ilang nasikop sila si Ashley Roshana,26 anyos,taga-Bulua;Cathy Reyes,20 anyos nga taga-Malaybalay City ug Christian Chua alyas Opaw nga taga-Brgy 11 sa syudad.
Si Roshana ug Reyes ang nasikop sulod sa Wills Place Inn samtang si Chua nasapon usab nila kuyog sa hiningugma niini sa laing lodging house kagabii.
Nakuha gikan sa mga suspek ang pipila ka sachet sa gitoohang shabu,balor sa salapi ug drug paraphernalia.
Kasuhan sa kapolisan sa piskalya ang mga suspek ning adlawa.
Samtang gihimakak sa suspek nga si Chua nga namaligya siya sa ginadiling druga.
Namugos si Chua nga igo lamang siya nagpalit sa shabu aron gamiton niya sa ilang pagtagay sa lawasnong kalipay kauban ang iyang higala sulod sa Wills Place Inn sa may dalang Velez-Yacapin ning
syudad.
Lakip usab nga nadakpan ang gi-ingong “best-friend” ni Chua sa maong operasyon human angkona niini nga silang duha ang mikonsomo sa ilang ghipalit nga drugang shabu.
Malaumon si Chua nga makagawas ra gihapon sa human iyang gibutyag nga dunay kini paryente sa Amerika nga mu-abag kaniya nga makapyansa.
