CAGAYAN DE ORO CITY -Pagpanghadlok ang nag-unang tuyo sa mga suspek nga mibutang sa upat ka IMPROVISED EXPLOSIVE DEVICES o IEDs sulod sa bag ug gibilin duol sa Emyat Ukay-Ukay Stall nga dili ra layo sa Gaisano Mall sa Brgy Villa Verde,Iligan City.
Kini ang katin-awan ni Police Regional Office 10 Director Brig.Gen.Lawrence Coop subay sa narekober sa crime scene sa mga otoridad sa maong syudad sa miaging adlaw’ng Domingo.
Namahayag si Coop nga basi sa narekober nga IEDs,kulang kini sa dugang components aron makabusikad.Apan gimando niini ang subsob nga imbestigasyon kon kinsa ang mga responsable sa pagpasulod sa maong IEDs nga naghatag sa kalisang sa publiko.
Namugos usab ang heneral nga dili ma-konek ang motibo sa nagkaduol nga brgy ug sk elections ning tuiga.
Dumduman nga sa miaging semana,nabawi usab sa hiniusang operasyon sa kapolisan ug militar ang bomba nga iya sa Maute-ISIS local terror members dihang nalusob ang ilang hideout sa Brgy Bowi,lungsod sa Pantar,Lanao del Norte.
