CAGAYAN DE ORO CITY-Gipahimudsan sa upat ka aktibong miembro sa rebeldeng New People’s Army o NPA ang tanyag nga Enhanced Comprehensive Local Integration Program o E-CLIP sa gobierno.
Kini human mitahan ang maong mga rebelde sa 1st Special Forces Batallion dala ang ilang mga armas sa lungsod sa Talakag, Bukidnon.
Gibutyag ni 1st Special Forces Batallion commanding officer Lt Col Sergio Macarandan Jr nga ang kalisod sa kahimtang ug giingong kurapsyon sulod sa kalihukang komunista ang rason kon nganong mitahan ang upat nga gikan sa nagkadaiyang guerilla fronts sa NPA.
Kabahin sa gitugyan sa mga rebelde balik sa gobierno ang M16 rifle;duha ka caliber .30 M1 Garand rifles, caliber 30 M1 Carbine rifle ug caliber .30 Enfield rifle.
Gipaubos na sa proseso ang maong mga rebelde pinasikad sa E-CLIP program sa gobierno aron mahatagan sa disente nga panginabuhian bugti sa pagbalik sa kinabuhing sibilyan.
