CAGAYAN DE ORO CITY – Misaka pa sa upat ka kinabuhi nga gilakipan sa 3 ka terorista ug usa ka sundalo ang nakalas sa padayong engkuwentro tali sa militar ug Maute-ISIS inspired ‘Dawlah Islamiyah sa Brgy Runggayan,Maguing,Lanao del Sur.
Kini samtang nailog na sa militar ang nagsilbing kota sa mga teorista nga gipanguluhan sa usa ka Abu Zacaria nga tuyo unta sikopon sa kapolisan sa maong lugar.
Gibutyag ni Western Mindanao Command spokesperson Maj Andrew Linao nga upat na usab ka sundalo ang samaron sa engkuwentro ug nadala sa ospital.
Dugang ni Linao nga nabawi usab sa ilang tropa ang tag-as nga mga armas ug 22 ka bomba nga iya sa mga nakasibat nga mga terorista.
Samtang gipanghimakak sa militar ang unang gikataho sa Maguing MDRRMO nga dunay mga sibilyan ilabina kabataan ang samaron nunot sa 12 ka bomba nga gihulog sa Philippine Air Force sa lokasyon sa mga terorista.
Miingon si Linao nga layo sa residential area ang lokasyon sa airstrike apan gikompirmar nila nga dunay pagpangbakwit sa mga molopyo sa mas luwas nga lugar.
Una nang midangop sa evacuation centers ang sobra libo ka pamilya ug uban sa mismo nilang kabanay samtang wala pa hunungi sa militar ang paggukod sa mga terorista.
