CAGAYAN DE ORO CITY – Gikasuhan na sa kapolisan sa pagsupak sa Comprehensive Dangerous Drugs Act of 2002 ang upat ka suspected shabu sellers nga nasigpaw sa hiniusang search warrant operation sa Purok 3,Brgy Punong,Gingoog City, Misamis Oriental.
Kini human nahan-ay na ang mga dokumento kabahin sa pagdaso sa kaso batok sa tulo ka dinakpan nga sila alyas Roy,Emanuel ug Arnel samtang gawasnon ang nakasibat nga si alyas Christhoper.
Nadakpan ang mga suspek pinasikad sa kasuguan sa korte nga unang gipangayua’g pagtugot sa tropa sa City Drug Enforcement Unit ubos sa Gingoog City Police Station kuyog ang 1001st Regional Mobile Force Batallion 10 sa lugar.
Nabawian ang mga dinakpan sa sobra tunga-milyones pesos nga gitoohang shabu kuyog ang laing sobra 11-mil pesos nga gigamit sa cash transaction.
