CAGAYAN DE ORO CITY – Gitakdang itugyan sa 58th IB,Philippine Army sa PNP ang upat ka aktibong sakop sa NPA rebels nga una nila nga nadakpan sa lungsod sa Lagonglong,Misamis Oriental.
Miingon si 58th IB,Philippine Army commander Lt Col Ricky Canatoy nga giila ang mga dinakpan nga sila si Marlon Acosta alyas Jonathan;Marnie Berito alyas Edward;Nelson Berito alyas Lorence ug Jeffrey Macabecha alyas Jelo nga pulos sakop sa Platoon Cherry Mobile, Huawei, Sub-Regional Committee 1, North Central Mindanao Regional Command.
Gibutyag ni Canatoy nga nasikop ang mga rebelde tungod sa pagtug-an usab sa mga mitahan nga sila si alyas Juno ug alyas Yesa kinsa kabahin sa gika-engkuwentro sa militar sa lungsod sa Salay ning lalawigan sa miaging semana.
Nakompiskar usab gikan sa upat ka dinakpan ang AK 47 rifle, duha ka .30 caliber carbines ug 15 rounds sa .40mm grenade launcher ammunition.
