CAGAYAN DE ORO CITY – Mag-atubang sa kasong reckless imprudence resulting in multiple homicide ug damage to property ang wing van driver tungod sa kamatayon sa upat ka trabante sa kompanyang Shell epekto sa duguong aksidente sa Sayre Highway,Brgy Tangkolan,Manolo Fortich,Bukidnon.
Giila ni Manolo Fortich Police Station commander Police Maj. Harvey Sanchez ang mga namatay’ng biktima nga sila Gelan Morales; Daisirie Racaza;Olivia Alimes ug mismong driver sa L-300 van nga si Rico Cagnaan nga pulos taga- Davao City.
Saysay ni Sanchez nga gikan sa Davao City ug padulong dinhi sa syudad ang mga biktima dihang kalit nawad-an sa kontrol ang van hinungdang nakatipas sa pikas lane ug nasungag ang wing van nga gimaneho usab ni Nielboy Agocoy nga taga-Malaybalay City nga gikan dinhi sa syudad ug padulong sa Bukidnon.
Gitoohan nga nakatulog si Cagnaan tungod sa kalayo sa ilang biyahe hinungdang dead on the spot ang mga biktima samtang gilayong gi-kustodiya sa mini-cell sa kapolisan si Agocoy diin kamulo na ang paghikay sa kasong kriminal nunot sa hitabo.
