CAGAYAN DE ORO CITY – Nahurot pagkamatay ang upat ka tawo nga gilangkuban sa duha ka hamtong laing duha menor de edad sa pagkaunlod sa sakayang-dagat nga gikan lungsod sa Tambulig,Zamboanga del Sur ug pauli na unta sa Brgy Bocator sa Tangub City,Misamis Occidental.
Giila sa Tambulig MDRRMO ang mga dead on arrival sa ospital nga sila Devina Fuentes Aligaya,38 anyos ug Donabelle Fuentes De la Cruz samtang naugmaan na ang pagka-rekober sa duha ka bata nga nag-edad 3 ug 9 anyos nga pulos wala na gihapo’y kinabuhi nga tanan nagpuyo sa Tangub City.
Sumala sa imbestigasyon,kalit mipalyar ang makina sa sakayang-pandagat nga walay katig diin sakay ang 13 ka pasahero ug gimaneho sa 12 anyos nga Khent Joseph Vergara de la Cruz.
Paspas ang pag-unlod sa sakayang-pandagat hinungdang napugos pagpanglukso ang mga pasahero.
Apan walay suwerte ang upat sa maong mga pasahero nga ulahi na sila naluwas sa search and rescue teams nga nakaabot sa lugar.
Kabahin sa mga naluwas ug nagpaubos sa medikasyon sa Clinica Ozaraga Doctors Hospital sa lungsod sa Bonifacio,Misamis Occidental sila Reynar Belarmino Dela Cruz , 50 anyos mananagat minyo ,Eunice Fuentes Dela Cruz,19 anyos dalaga, Rechelle Ann Fuentes Dela Cruz, 17 anyos dalaga, Rhea May Fuentes Dela Cruz, 12 anyos, ang driver nga si Khent Joseph Vergara Dela Cruz, 12 anyos, Charlson Jhacob Vergara Dela Cruz, 7 anyos ,Quennie Joy Vergara Dela Cruz, 5 anyos ,John James Panero Fuentes, 11 anyos ug Jhane Fuentes Aligaya, 6 anyos.
