Nagmalinawon ang tibook Northern Mindanao Region sa pagbalaan sa mga adlaw sa Semana Santa.
Subay kini sa security assessment sa Police Regional Office (PRO-10).
Gibutyag ni PRO 10 – Regional Director PBGEN Christopher Abrahano nga hapsay ang ilang obserbasyon sa rehiyon ug walay natala nga dagkung panghitabo sugod sa Domingo sa Lukay.
Kapin sa 5,200 ka persona ang gipakatap aron masiguro nga luwas ang mga simbahan, kadalanan, ug transport hubs, nga nagresulta sa 45.95% nga pagkunhod sa mga krimen itande sa miaging tuig.
Ning tuiga anaa lamang sa 20 ka insidente itande sa 37 sa 2025.
Bisan pa sa daghang deboto ug biyahero, wala’y natala nga insidente gawas sa upat ka kaso sa pagkalumos nga nakapatay sa upat ka tawo.
Gi-awhag sa mga awtoridad ang katawhan nga magpabilin nga mabinantayon labi na duol sa tubig.
Nakumpiskar usab sa PRO 10 ang smuggled cigarettes nga nagkantidad sa ₱39.2 milyon ug ₱2.8 milyon nga mga butang gikan sa illegal mining operations, nga nagpakita sa padayon nga kampanya batok kriminalidad.
