CAGAYAN DE ORO CITY-Detinado ang tulo ka aktibong sakop ug laing usa ka dismissed member sa PDEA-10 sa mini-cell sa Bulua Police Station ning syudad.
Kini human giingong mihimo’g pagpabuto sa mga armas ug pagpangdagmal sa pipila ka taxi drivers diha sa Fatima Subdivision,Brgy Pagatpat ning syudad kagahapon sa hapon.
Giila ni Bulua Police Station commander Sr/Insp Ruth Townend ang mga dinakpan nga sila si PDEA members Ramil Salido;Jeffrey Tagungan;Marvin Banate ug Randy Dollente.
Subay sa reklamo sa gipangbunala’g armas nga taxi drivers nga dunay gikalalis ang usa sa mga ahente sa PDEA tungod sa away pamilya dihang kalit kining nasuko ug milaban ang laing tulo kauban diin nagpabuto sa ilang mga armas.
Nakuha gikan sa mga suspek ang upat ka armas ug laing duha ka sakyanan human sa hitabo.
Gihupay ni Hortillosa ang kabalaka sa katawhan nga dunay pag-whitewash sa pagpangabuso sa upat ka sakop sa PDEA-10 diha sa Brgy Pagatpat ning syudad.
Miingon si Hortillosa nga kasuhan nila ang mga suspek subay usab sa isang-at nga reklamo sa mga sibilyan sa maong lugar.
Gibutyag ni Hortillosa nga buhaton nila ang angay subay sa gimando sa balaod.
