CAGAYAN DE ORO CITY – Gikompirmar sa Police Regional Office 10 nga pipila sa ilang nadisgrasyang pulis ang nabalian sa bukog sa dihang nahulog sa bakilid nga bahin sa highway ang ilang gisakyan nga govt vehicle sa Purok 5,Brgy Quezon,Gitagum,Misamis Oriental kagahapon sa buntag.
Gitumbok ni PRO 10 spokesperson Police Maj.Joann Navarro ang na-grabehan nga si Police Senior Master Sgt Abdul Sanayon kinsa nabilian sa tiil samtang samaron usab gihapon sila Staff Sgt Omar Mamle,Staff Sgt Jeffrey Credo ug Police Corporal Wodhurd Matugas nga pulos sakop sa Nunungan Police Station nga nakabase sa Lanao del Norte.
Una nang gibutyag ni Gitagum Police Station commander Police Maj. Dennis Cerilla nga padulong unta sa Camp Alagar ang mga biktima alang sa ilang neuro exam sa dihang kalit mibuto ang wala nga ligid sa ilang sakyanan hinungdan sa aksidente.
Naka-confine ang mga biktima sa ospital sa Iligan City.
Dugtong niini,nagpasidaan ang kampo sa tanang mga pulis nga kanunay nga susihon daan ang kondisyon sa sakyanan ayha mohimo’g mga pagbiyahe.
