CAGAYAN DE ORO CITY – Luwas na sa kuyaw nga kahimtang ang upat ka pulis nga naigo sa bala sa armas nga M203 nga gipabuto sa rebeldeng New People’s Army o NPA sa Concepcion,Misamis Occidental.
Kini human nakaangkon sa mga samad ang maong mga pulis samtang nagbantay sa quarantine control point kontra coronavirus disease.
Giila ni Police Regional Office 10 Director Brig Gen Rolando Anduyan ang mga biktima nga sila si Staff Sgt Larry Millan,Cpl Leo Gumasid,Cpl Marvin Inyong ug Patrolwoman Richel Tanola nga ubos sa Concepcion Municipal Police Station.
Gikompirmar usab sa heneral nga napatay sa kapolisan ang usa ka lalaki nga NPA member ug nakuha ang bitbit nga armas niini.
Gibutyag ni Andunyan nga gipahimungtan sa mga rebelde ang quarantine control point kay naipit na sila sa AFP-PNP operations nga gilusad sa bukid nga bahin sa Misamis Occidental.
