CAGAYAN DE ORO CITY – Napasaka na sa kapolisan ang usurpation of authority batok sa upat ka lalaki nga nagpalusot sa 181 ka kahon sa sigarilyo didto sa Bonifacio,Misamis Occidental.
Kini human nagpatoo ang mga suspek nga konektado sa Zamboanga del Sur Provincial Disaster Risk Reduction Office aron dili harangon sa mga police checkpoint.
Giila ang mga dinakpan nga sila si John Mark Trocio,30 anyos,Yandre Gonzales,40 anyos,Noel Cabonilas,42 anyos ug Richard Susi,49 anyos nga pulos nagpuyo sa Pagadian City.
Miingon si Misamis Occidental PNP Director Col Danildo Tumanda nga unang nagpatoo nga kopras ang karga sa truck nga gimaneho ni Susi apan sa pagsusi,nabulgar nga smuggled cigarettes gikan sa gawas nga dunay kapi’g 4 milyon pesos nga excise tax ang kantidad ang tuyo ipalusot sa mga suspek.
Nasuta nga gipanag-iya sa dakong negosyante sa Pagadian City ang tag-iya sa maong kontrabando.
Nabulgar nga ikaduha na kini gihimo sa maong mga suspek diin duha kanila ang trabahante sa gobierno ayha nadakpan sa road checkpoint sa maong lugar sa miaging adlaw.
