CAGAYAN DE ORO CITY -Moabot sa kapin 40 ka panimalay ang nagguba human miigo ang 6.0 magnitude nga linog sa Wao, Lanao del Sur.
Matud ni Wao Municipal Disaster Risk and Reduction Management Council head Francis Garcia nga lima ka gambalay ang dili na maggamit sama sa tunghaan, duha ka mosque ug usa ka pension house human mabungkag ang mga dingding.
Sa pagkakaron, nagpadayon ang gihimong assesment sa mga brgy opisyal ilabina nga natala sa amihanang-kasadpang bahin sa Wao, Lanao del Sur ang epicenter sa 6.0 magnitude nga miigo kaganinang kadlawon.
Walay gika-report nga namatay o naangol sa maong pagtay-og.Samtang gikumpirmar ni Kalilangan Mayor Omaraji Pizarro nga mismo ang ilang sangguniang bayan building ang nagguba tungod sa 6.0 magnitude nga linog nga miigo sa Bukidnon kaganinang kadlawon.
Matud ni Pizarro nga iya unang gipasirad-an ang maong gambalay ug iyang itugyan sa mga personahe sa Phivolcs ang pagsuta kon pila ang damyos niini.
Gawas nga nangliki ang dingding sa maong gambalay, nangabuak usab ang mga espiho tungod sa linog.
Nahukman usab ni Pizarro nga dili paagian sa mga dagko nga sakyanan ang usa ka tulay nga giingong miliki tungod sa 6.0 magnitude nga linog nga miigo sa Bukidnon.
Si Pizarro miingon nga iyang gipasuta karon kung unsay damyos sa maong linog aron ilang mapangandaman.
Hisayran nga adunay national highway nga nagkonektar sa ilang lugar padulong sa laing lugar ang miliki tungod sa linog.
Nagpadayon pa ang gihimong assesment sa kapulisan kalabot na sa damyos sa maong linog.
