CAGAYAN DE ORO CITY – Naugdaw ang 30 hangtud 40 ka panimalay sa dakong sunog nga natigayon sa Mulmac, Brgy. Macabalan ning syudad.Paspas nga mikaylap ang kalayo tungod kay pulos gama kini sa light materials.
Si F03 Jesrel Lazaga, imbestigador sa City Fire Department miingon nga nagsugod ang sunog sa 3rd floor nga bahin sa panimalay ni Jener Wabe.
Pabilin pa nga gisuta sa Bureau of Fire Protection ang hinungdan sa sunog diin anaa sa P1.3 milyones ang structural damage.
Gibutyag ni Lazaga nga naglisod sila pagpalong sa kalayo tungod sa kagamay sa dalan.
Samtang blangko ang magtiayong Waban kon nganong kalit nga midilaab ang kalayo sa ikatulo nga andana sa ilang panimalay.
Kini human gibutyag sa mga silingan ni Jener ug Iris Waban nga sa ilang panimalay naggikan ang kalayo ug paspas kini nga miklaylap sa laing panimalay.
Sumala ni Jener nga gihimo nila nga bodega ang taas nga bahin sa ilang panimalay.
Gisalikway usab niini ang alegasyon nga posibleng short circuit ang hinungdan sa sunog tungod kay gipalong niini ang plangka sa ilang kuryente dihang milakaw.
Hinoon walay nasamdan sa maong sunog.Samtang temporaryong gipahiluna sa duha ka covered court sa tunghaan ang 30 hangtud 40 ka pamilya nga apektado sa dakong sunog.
Matud ni Macabalan Barangay Capt. Norbel Saa nga gihimo niya nga evacuation center ang Macabalan Elementary School covered court ug Macabalan National High School covered court alang sa mga apektadong pamilya.
Gani, nanawagan ang opisyal sa mga adunay malumong kasing-kasing nga magpadangat sa ilang mga hinabang alang sa mga nasunugan.
Una nang gipasalig ni Saa nga mohatag hinabang ang barangay sa mga nawad-a’g panimalay.
Samtang nakadawat na’g pasiunang hinabang gikan sa lokal nga kagamhanan ang mga nasunugan.
Si City administrator Teddy Sabugaa miingon nga gilayon nga nagpadala siya’g team nga maoy mag-areglar sa mga panginahanglanon sa apektadong pamilya.
Gibutyag usab ni Sabugaa nga ilang sutaon ang sitwasyon sa yuta nga gi-ugbokan sa mga residente ilabina nga miggawas ang report nga dugay na sila nga pahawaon sa tag-iya sa luna sa maong lugar.
Dugang niini nga mohimo pa sila’g assessment kon kinsa ang angayang makadawat hinabang sa mga nasunugan.
