Wala pa gihapon nahamtang ug wala pay pinal nga pag-aprubar ang gikatakdang 40% nga umento sa tingil sa tubig sa dakbayan, sumala pa kang Cagayan de Oro Water District (COWD) Chairman of the Board Dr. Gerry J. Caño.
Gihimo niya kini nga pahayag human mitambong ang ilang management team sa tigom sa Committee on Public Utilities sa konseho aron tubagon ang mga pangutana sa mga miyembro niini.
Gawas sa pagpasabot nga gihatag nila ang tanang tubag sa mga kabalaka nga gipatungha sa mga konsehal, gipaniguro usab ni Dr. Caño nga dili “profit-oriented” ang ahensya kondili usa ka “service-oriented” nga pasilidad, diin ang tanang kinitaan niini ibalik ra sa pag-ugmad sa serbisyo.
Sa pagkakaron, human makuha sa ahensya ang positibong pagsabot sa katawhan alang sa umento, nagpabiling nagpaabot ang buhatan sa pinal nga pag-aprubar niini.
