(Update) CAGAYAN DE ORO CITY – Mipaubos sa laing han-ay sa orientation ang 400 ka pulis nga gikan sa Police Regional Office 10 nga nagsilbing special board of election inspectors sa Commission on Elections ug Lanao del Sur Police Provincial Office sa probinsya sa Lanao del Sur.
Kini human kompirmaha ni PRO 10 regional spokesperson Major Joann Navarro nga nahidangat ang contingent sa Northern Mindanao isip dugang puwersa nga mopasayon sa paglusad sa May 12 elections sa maong probinsya sa Bangsamoro Autonomous Region in Muslim Mindanao o BARMM.
Miingon si Navarro nga gikinahanglan sa maong mga pulis nga mangayo’g security briefing aron sa mismong adlaw sa piliay,aduna na sila’y ideya sa lungsod diin sila mahimutang.
Dumduman nga pipila sa mga lungsod sa Lanao del Sur ang ubos sa red category nga nagkahulugan nga naghinobra ang kainit sa politika tali sa mga kandidato nga milansad sa nagkadaiyang posisyon sa piliay.
Hisayrang gawas sa hagit sa pipila ka mga politiko- nga posibleng nagkupot sa armadong grupo,anaa usab ang gamay’ng presensiya sa nabiling Dawlah lslamiyah Maute members nga tipik sa gibantayan nga dili makapanghasi sa mismong adlaw sa eleksyon.
