CAGAYAN DE ORO CITY – Gipasidunggan ni PNP chief Gen Benjamin Acorda Jr ang mga pulis nga maoy nakabawi sa 16 ka klase-klaseng armas nga iya sa CPP-NPA nga gipanglubong sa Brgy Lapok,Talakag,Bukidnon.
Kini human personal nga gidalikyatan ni Acorda ang maong kalampusan nga gi-presentar sa Camp Alagar diin nakabase ang headquarters sa Police Regional Office 10 sa syudad.
Gawas sa mga armas nga gisusi sa heneral,gi-presentar usab atubangan sa publiko ang 43 ka sakop sa CPP-NPA rebels nga nagbalik na sa gobierno nga ubos sa Area Police Command- Eastern Mindanao nga gipanguluhan ni Police Lt Gen Filmore Escobal nga gisakasihan ni 4th ID asst division commander Brig Gen Joel Paloma ug ubang govt officials.
Una niini,gipanguluhan usab ni Acorda ang pagpahurar sa 43 ka kanhi CPP-NPA combatants nga dili na mobalik pa sa ilang armadong pakigbisog apan pahimuslan na ang mga programa nga gitanyag alang kanila.
