CAGAYAN DE ORO CITY – Na-kontrol na sa militar ug kapolisan ang mga lihok sa armadong pundok nga misulay pag-ilog sa patrol base nga iya sa PNP sa Brgy Kabadiangan,Kadingilan,Bukidnon.
Kini human mi-resulta sa pila ka oras nga engkuwentro sa hiniusang puwersang militar ug kapolisan paglusob sa 60 ka armadong pundok nga gikan pa sa lungsod Carmen,North Cotabato sa miaging kadlawon.
Miingon si Police Regional Office 10 spokesperson Police Maj Joann Navarro nga sa maong engkuwentro,napatay nila ang sakop sa armadong grupo nga si Hilario Campong ug daghan usab ang mga samaran.
Siya miingon nga anaa usab sa sobra 430 ka pamilya ang apektado ug nangbakwit sa sentro nga bahin sa lungsod aron dilli maipit sa kagubot.
Nasuta nga isyu sa yuta tali sa Kadingilan ug Carmen ang rason sa pagpanulong sa maong pundok sa miaging kadlawon.
Samtang dili na ibalik ni Kadingilan Mayor Jerry Canoy Jr ang sobra 400 ka pamilya nga napugos paghikling gikan sa ilang mga balay padulong sa mas luwas nga bahin sa ilang lungsod.
Kini human kompirmaha ni Canoy tungod sa impormasyon nga peligro pa ang kahimtang sa ilang lungsod kay mohimo pa’g pagbalos maong pundok.
Miingon ang mayor nga tungod sa kamatayon sa usa ka sakop sa armadong grupo ug daghan ang samaron,dili una nila ibutang sa risgo ang seguridad sa ilang katawhan.
Hisayrang dekada 80 pa nagsugod ang political boundary conflict tali sa maong lungsod ug Carmen,North Cotabato.
