CAGAYAN DE ORO CITY – Gipalig-on pa sa Police Regional Office 10 ang kampanya sa pagmintinar sa kahusay’g kalinaw ubos sa hurisdiksyon sa Cagayan de Oro City Police Office/COCPO nga nakabase sa Brgy 40 ning syudad.
Kini human pangunayi ni PRO 10 Director Brig Gen Rolindo Suguilon ang paghatod sa 45 ka units sa smartphones nga direktang magamit sa COCPO beat patrollers nga natahasan sa pagpatrolya sa nagkadaiyang kadalanan sa dakbayan.
Gibutyag ni Suguilon nga makatabang na kini nga mas maka-pokus pa sa ilang mga tahas ang beat patrollers gamit ang bag-ong klase sa mga telepono alang sa paspas nga pagresponde.
Kuyog sa heneral sa pagdalikyat sa COCPO headquarters ang iyang deputy director for operations Col. Aaron Mandia kinsa nagsilbi usab nga city director sa pamulis sa dakbayan.
Dugtong niini,gipasalamatan ni COCPO Director Col. Salvador Radam ang natunol nga tabang gikan sa Kampo Alagar.
Siya miingon nga ang maong inisyatiba sa PRO 10 ang simbolo sa moderno ug mas epesyente nga serbisyo-publiko sa kapolisan sa dakbayan.
