CAGAYAN DE ORO CITY – Gisugdan na sa 464 ka bar takers ang ilang unang adlaw sa pasulit alang sa tinguha nga mahimong hingpit nga abogado diha sa Xavier University o Ateneo de Cagayan sa Corrales-Hayes Streets ning syudad.
Kabahin sa examinees nga milambigit sa maong pasulit ang mismong gikan sa maong unibersidad,Liceo de Cagayan University ug bisan ang Misamis University nga nakabase sa Ozamiz City.
Mipadayag usab sa suporta ang nagkadaiyang law fraternities ug sorrorities alang sa ilang mga kauban nga mipaubos sa bar exams.
Miingon si TANDU Legis Fraternitas Supremo Spence Palen nga giduyugan nila sa mga pag-ampo ug paghatag kadasig ang ilang mga kauban nga bar takers ilabina nga molungtad kini sa upat ka adlaw.
Samtang nag-abiso ang buhatan sa Roads and Traffic Administration o RTA nga pabiling dili paagian ang dalan nga Hayes diin nahimutang ang Xavier University ning syudad.
Kini sa tuyo nga dili madisturbo ang 464 ka bar examinees nga kabahin sa sobra 9-mil ka mikuha sa maong pasulit aron mahimong abogado ning tuiga.
Gihimo ni RTA asst administrator Engr Nonito Oclarit ang pasidaan aron dili usab mahinayak ug mabalda ang mga motorista ug trabahante sa pag-agi sa maong lugar.
Gisugdan ning adlawa ang bar exams,sundan kini sa petsa 13,16 ug Nobyembre 20 nga dili lamang dinhi sa dakbayan apan bisan sa ubang bahin sa nasud.
