CAGAYAN DE ORO CITY – Mohimo pa sa post damage assessment ang puwersa sa Office of the Civil Defense 10 aron aktuwal masuta ang kadako sa damyos sa lima ka probinsya nga napiskan sa epekto sa bagyong Odette sa Northern Mindanao.
Kini human pabiling nagsaka ang ihap sa mga pamilya nga apektado sa maong kalamidad ug ang balor sa damyos sa imprastraktura,agrikultura ug personal nga kabtangan sa katawhan.
Gibutyag ni OCD 10 asst regional director Gilbert Conde nga anaa na sa 427 ka brgy ang apektado diin naggikan ang 49-mil 550 ka pamilya o 182-mil 344 ka tawo.
Siya miingon nga pabiling 7 pa gihapon ang kompirmadong namatay samtang 16 ang samaron ug 772 ka balay ang nagguba diin 5-mil 978 ang nagsilbing partially damage.Halos 300-milyon pesos na usab sa aspetong imprastraktura ang nadamyos sa trahedya.
Samtang gilauman sa Dept of Agriculture 10 ang pagsaka sa damyos epekto sa pagbanlas sa tubig–baha sa mga pananom dala sa bagyong Odette dinhi sa Northern Mindanao.
Kini human isulti ni DA-10’s technical director Carlotta Madriaga nga pasiunang 300 milyones pesos na ang bana-bana produktong agrikultura ug mga binuhing mananap ang natala nga na-damyos.
Siya miingon nga mohimo pa sa pag-bisita ang ilang validation teams sa mga lugar nga dunay mga damyos nga resulta sa trahedya niadtong Disyembre 16,2021.
