CAGAYAN DE ORO CITY – Napukan na sa 4ID,Philippine Army ang 70 porsiento sa puwersa sa CPP-NPA nga naglihok sa tulo ka probinsya sa Amihang Mindanao ug sa mga lalawigan sa Caraga region.
Kini maoy gisaysay ni Brig Gen Cosmolito Yacle,assistant division commander sa 4ID atol sa pagdawat sa 36 ka dugang ihap sa mga rebelde nga nagbalik-gobierno diin gipahigayon ang seremonya sa kampo sa 403rd Infantry Brigade sa Bukidnon.
Miingon si Yacle kinsa representasyon ni 4ID commanding officer Maj Gen Jose Maria Cuerpo II nga napasayon ang pagpabalik sa mga rebelde sa sabakan sa balaod kay epektibo ang pagpatuman sa whole of the nation approach sa mga bukiran diin nadaug daug pag-ayo ang mga kabus.
Siya miingon nga anaa na lang sa 30 porsiento sa CPP-NPA ang ilang tiwasunon aron hingpit nang mawala ang armadong pakigbisog sa maong bahin sa Mindanao.
Hisayrang anaa sa 70 porsiento sa tropa sa mga sundalo ang naggukod sa nabilin ug nagmagahi pang mga rebelde sa bukiran aron sila pugson pagbungkag kon dili makahukom mobalik sa sabakan sa balaod.
