CAGAYAN DE ORO CITY – Gisiksik pa sa tropa sa 4th ID,Philippine Army ang mga hilit nga bahin sa tulo ka magkalahing lugar diin natigayon ang mga engkuwentro batok sa mga sakop sa New People’s Army/NPA sa Bukidnon.
Kini human gisugilon sa militarya nga anaa sa unom ka sakop sa NPA rebels ang napatay sa engkuwentro sukad sa panagsinukliay sa mga bala gikan sa Brgy Dumalaguing sa Impasug-ong ingon man sa Saldab Complex sa Malaybalay City ug ang ulahi sa bukiran sa Brgy Guilang-Guilang,Manolo Fortich.
Matud sa tigpamaba sa 4th ID nga si Army Major Joe Patrick Martinez nga walay hunong ang paggukod nila sa mga nagkatibulaag nga sakop sa CPP-NPA aron mahingpit nang makab-ot ang kahusay’g kalinaw sa Northern Mindanao region.
Siya miingon nga nasubo sila nga laing ihap sa mga rebelde ang nakalas kay dugong-Pilipinhon gihapon kini apan tahas nila ang pagpanalipd usab sa yutang-tabunon rason nga hipuson ang mga nakig-away’ng armado sa kagamhanan.
Dumduman nga unang giila ang mga napatay niadtong Agosto 13 nga sila Roxanne Saraus alyas Sham;Noel Domino alyas Noel;Bador Arellano alyas Choy; Noel Gabote alyas Julius ug ang laing duha padayon pa nga giila.
Hinoon,gitugyan na sa military ang mga naila nga patay’ng lawas ngadto sa ilang tagsa-tagsa ka pamilya sukad pa sa miaging semana.
Sa magkalahing engkuwetro nga natigayon Agosto 13 ug 18,may mga armas ug kabtangan sa mga rebelde ang nabawi sa mga sundalo sa encounter sites.
Hisayrang sa miaging semana, upat ka NPA commanders kuyog sa ilang mga sakop ang Dungan nga mibalik sa kagamhanan ug gisawilik na ang armadong-pakigbisog kay wala sila’y nakuha nga kaayuhan.(With reports Bombo Radyo Malaybalay,Bukidnon).
