CAGAYAN DE ORO CITY – Gibarugan sa sa liderato sa 4th Infantry Division ‘Diamond Troopers’,Philippine Army nga walay ‘conflict of interest’ sa pagsilbing bag-ong kumander sa Misamisnong heneral nga si Brig Gen Michelle Anayron Jr nga dunay kontrol sa tulo ka probinsya sa Northern Mindanao ug tibuok Caraga regions.
Kini ang tubag ni 4ID spokesperson Lt Col Francisco Garello Jr batok sa pagduda sa kampo ni kanhi Misamis Oriental 2nd District Congresswoman Juliette Uy kang Anayron kinsa anak ni Sugbongcogon mayoralty candidate Atty. Michelle Anayron Sr.
Miingon si Garello nga makuti nga proseso ang giagian ni Anayron Jr ayha natudlo ni Pres Bongbong Marcos nga division commander rason nga wala sa ensaktong templa ang panaghap sa kampo sa kanhi kongresista.
Siya miingon nga espekulasyon lang ang gipalutaw sa maong grupo sa mga kandidato apan gitahod nila kini.
Giklaro sa 4ID nga dili mahitabo nga manginlabot ang mga sundalo sa bisan unsa nga kalihukang-politikanhon kay pagbantay sa nasudnong-seguridad ang nag-unang tahas niini.
Dumduman nga gipadangat ni Uy kuyog ang ubay-ubay’ng mga kandidato pagka-mayores ang ilang recall petition ngadto sa Commission on Elections ug Armed Forces of the Philippines aron mahawa si Anayron Jr sa iyang gikuptang puwesto.
Hisayrang nalatid sa reklamo sa petitioners ang usa ka hitabo sa 2022 elections diin giingong lima ka sundalo ubos sa 4ID ang nalambigit sa pasangil nga pagpamalit sa mga boto ug panghadlok sa mga botante sa lungsod sa Villanueva,Misamis Oriental.
