CAGAYAN DE ORO CITY – Gipangayo pa gihapon sa 4ID,Philippine Army ang solidong suporta sa ubang ahensiya sa gobierno sa kampanya kontra insurhensiya nga binuhatan sa CPP-NPA.
Kini taliwala nga nagbaton na sa ‘zero presence’ sa guerilla front committees sa CPP-NPA ang pipila ka probinsya sa Northern Mindanao nga ubos sa hurisdiksyon sa Camp Evangelista.
Miingon si 4ID spokesperson Lt Col Francisco Garello Jr nga gamay na lang ang kulang ug mahugno na sa hingpit ang armadong kalihukan nga dakong bahad sa seguridad ug kalambuan sa nasud.
Siya miingon nga tungod sa ‘whole of the nation approach’ daghan sa top commanders sa CPP-NPA ang napatay sa engkuwentro samtang ang uban boluntaryong mibalik na sa gobierno.
Gani, nadakpan usab pinasikad sa warrant of arrest ang acting CPP-NPA chairman nga si Wigberto “Baylon” Villarico sa kauluhan tungod sa kasong kidnapping ug pagpatay sa miaging semana.
Hisayrang unang gihataga’g gradong otso sa 4ID ang ilang kampanya kontra inhurhensiya tungod sa dakong tabang sa National Task Force to End Local Communist Armed Conflict diin nahatag ang mga batakang serbisyo sa kabukiran nga dugay gipasagdan sa gobierno.
