CAGAYAN DE ORO CITY – Kadaugan alang sa katawhan ug hingpit nga paghatag sa hustisya sa mga biktima sa mga armadong kalihukan ang kamatayon sa dakong opisyal sa Communist Party of the Philippines- New People’s Army o CPP-NPA dihang nalukong sa kasundaluhan sa Brgy Pianing,Butuan City.
Kini ang reaksyon sa 4ID,Philippine Army pinaagi sa ilang tigpamaba nga si Lt Col.Francisco Garello Jr nunot sa pagka-patay ni Myrna Sularte alyas Maria Malaya sa engkuwentro kinsa nagsilbing kalihim sa CPP-NPA’s North Eastern Mindanao Regional Committee nga dunay control sa Northern Mindanao ug Caraga regions.
Miingon si Garello nga nagsilbing usa sa pinaka-notoryos nga NPA commander sa Pilipinas si Malaya gumikan sa kadaghan sa mga kasong criminal nga gi-atubang niini sa korte.
Si Malaya nga taga-Bayugan City ang nagsugod sa aktibong kalihukan tuig 1997 kuyog ang iyang napatay na usab nga kapikas nga si CPP-NPA national operations command chief Jorge Madlos alyas Ka Oris sa engkuwentro sa Impasug-ong, Bukidnon sa tuig 2021.
Hisayran may patong sa ulo si Malaya nga 5.6 milyones pesos gumikan sa daghang mga kasong criminal nga nahimo niini sa buhi pa.
