CAGAYAN DE ORO CITY – Pulos gibarugan sa liderato sa 4ID,Philippine Army pinaagi sa 58th Infantry Batallion ug Police Regional Office 10 nga wala sila’y nabantayan nga grabeng paglihok sa CPP-NPA aron sudlon ang nagkadaiyang unibersidad ingon man state colleges kay mang-recruit sa mga estudyante.
Kini human unang gitug-an sa intelligence division sa Philippine National Police sa Camp Crame pinaagi sa usa ka pagdungog sa senado nga nagsaka ang ihap sa mga estudyante nga nadani sa kalihukang armado.
Partikular nga nasampit sa maong pagdungog sa senado ang tunghaan sa Xavier University nga kanhi Ateneo de Cagayan nga nakabase dinhi sa dakbayan.
Namahayag sila 58th IB commander Lt Col Christian Uy ug PRO 10 spokesperson Major Joann Navarro nga mohimo una sila niini’g pakisusi kay sa ilang nasayran halos wala na’y kusog ang maong grupo kay daghan na sa ilang mga sakop ang misalikway ug nagbalik gobierno.
Miingon si Uy nga negatibo ang maong report ubos sa iyang hurisdiksyon sa silangang bahin sa Misamis Oriental.
Samtang gitug-an usab ni Navarro nga wala nila wad-a ang maong posibilidad apan negatibo kini nga impormasyon nga natuki sa ilang intelligence ug operation divisions sa Kampo Alagar.
Hisayrang kabahin ang Northern Mindanao nga may puwersa pa nga nabiling sa kalihukang CPP-NPA rason nga may igo pang tropa ang gipahimutang sa gobierno ilabina sa Bukidnon ug porsyon sa Misamis Oriental.
