CAGAYAN DE ORO CITY – Pagtu-is lamang ang gihimo sa kadagkuan sa CPP-NPA’s North Central Mindanao Regional Committe Region aron dili mosamot paghuyang ang ilang puwersa nga walay laing tuyo gawas sa paglumpag sa gobierno sa nasud.
Kini ang tubag ni 4ID,Philippine Army spokesperson Maj Francisco Garello Jr kabahin sa pasiatab sa nagpailang Ka Malim Mabini kabahin sa kamatayon sa magtiayong Vincent Isagani Madlos ug Angie Salinas.
Miingon si Garello nga dako’g epekto sa kalihukan sa mga rebelde ang laing kamatayon sa ilang mga opisyal hinungdang gitabunan kini sa organisasyon.
Nangugat ang opisyal nga aron dili mohuyang ang morale sa kalihukan,gipamugos sa pikas grupo ang ilang propaganda sa tuyo nga likayan ang pagpanganaug sa mga kaubanan niini sa kabukiran.
Ang magtiayong Madlos ang pulos nag-atubang sa daghang mga kasong kriminal sa mga korte sa Northern Mindanao ug Caraga regions.
Samtang giakusahan sa CPP-NPA’s North Central Mindanao Regional Committe Region nga laing extra judicial killings o EJK ang gihimo sa mga sundalo sa 4ID sa kamatayon sa magtiayong Madlos sa Brgy Kapitan Bayong,Impasug-ong,Bukidnon.
Kini human wala angkona sa nagpailang tigpamaba sa NCMRC nga si Ka Malim Mabini nga namatay tungod sa 15 minutos nga engkuwntro ang magtiayong Madlos sa lugar sa miaging semana.
Miingon si Mabini nga kon giunsa sa militar pagpatay si CPP-NPA Mindanao National Operations Command commander Jorge Madlos alyas Ka Oris sa miaging tuig,ingon adto usab ang gidangatan nga kamatayon sa iyang anak ug umagad.
Namugos si Ka Malim nga walay engkuwentro apan gidagit sa militar ang ilang duha ka opisyal ayha gipatay.
