Gipahinumduman ni Zerlate Buranday, co-op educator ug ethics committee officer sa Oro Integrated Cooperative, ang mga pamilyang benepisaryo sa government cash grants sama sa 4Ps nga kinahanglan husto ug responsable ang ilang paggasto sa maong ayuda.
Matud ni Buranday, ang cash grant usa lamang ka suporta sa gobyerno aron makatabang sa pagsukol sa adlaw-adlaw nga panginahanglan ug dili kini bug-os nga tubag sa tanang gastohonon sa pamilya.
Dugang pa niya nga kinahanglan unahon ang pagplano ug paglista sa mga galastuhan kay limitado ra ang kapanguhaan samtang daghan kaayo ang mga panginahanglan sa matag panimalay.
Giingon usab niya nga ang dili pagplano sa paggasto kasagaran mosangpot sa sayop nga desisyon sama sa impulsive nga pagpamalit nga wala’y klarong prayoridad.
Busa, gipasabot ni Buranday nga kinahanglan ang disiplina sa budgeting aron masiguro nga ang ayuda magamit sa pinakaimportanteng panginahanglan sa pamilya ug molig-on ang pinansyal nga kahimtang sa mga benepisyaryo.
