Malampusong gipahigayon sa 4th Field Artillery Battalion ang duha ka adlaw nga Live Fire Exercise sa Barangay Capitan Bayong, Impasug‑ong, Bukidnon niadtong Mayo 20 ug 21 isip kabahin sa ilang Field Artillery Gunnery Proficiency Training.
Matud ni Lieutenant Colonel Allan M. Peñaflor, tumong sa maong ehersisyo ang pagpalig‑on sa kahandam sa mga sundalo ug pagsusi sa kahimtang sa ilang mga howitzer ug ammunition.
Mokabat sa 40 ka rounds sa assorted ammunition, lakip ang High Explosive, White Phosphorus ug illumination rounds, ang gigamit atol sa training.
Gipasabot sa opisyal nga gisulayan usab nila ang koordinasyon sa Forward Observer, Fire Direction Center ug gunnery team aron maseguro ang tukmang artillery fire missions.
Gibutyag ni Peñaflor nga malampuson nilang naigo ang target area atol sa exercise nga gi‑obserbahan sa mga lokal nga opisyal, stakeholders ug mga opisyal sa Philippine Army.
