CAGAYAN DE ORO CITY – Gipatuman sa 4th ID,Philippine Army ang kabag-uhan sa ilang combat strategy warfare batok sa CPP-NPA nga naglihok sa Northern Mindanao ug Caraga regions.
Kini isip kabahin sa pagsanong sa mando ni Pres Rodrigo Duterte nga hingpit nang malumpag ang insurhensiya igo pag-abot sa Hunyo 20,2022.
Gibutyag ni 4th ID commander Maj Gen Andres Centino nga nakita nila nga epektibo ang maong inobasyon hinungdan nga daghan sa opisyal,miembro ug supporters ang napatay ug nadakpan sa mga operasyon sa tuig 2020.
Kabahin sa gihimong pananglitan ni Centino ang 17 ka rebelde nga napatay sa AFP offensives sa Gingoog City,Misamis Oriental sa miaging tuig.
Samtang gipadumduman ni incoming AFP chief of staff Gen Cirilito Sobejana ang kasundaluhan nga kanunay mapaubsanon samtang mosilbi ug mohatag proteksyon sa katawhan.
Kini tungod kay nagsilbi lamang nga bonus ang pagbaton nila sa mga ranggo sa ilang serbisyo ug dili angay magpasigarbo aron kalikayan nga nga mahimong mga abusado ngadto sa publiko.
Gihimo ni Sobejana ang pasidaan samtang gihatagan niini’g taas nga pag-ila ang mga sundalo nga ubos sa 4th ID kinsa dako’g papel aron kibhangan ang kalihukan sa insurhensiya sa Mindanao.
