CAGAYAN DE ORO CITY- Gisugdan na’g imbestigar sa 4th ID,Philippine Army ang grupo nga utok sa red-tagging o pasangil nga supporter sa CPP-NPA sila si veteran journalists Froilan Gallardo ug Cong Corrales ning syudad.
Kini human unang giakusahan si Corrales nga kumander sa CPP-NPA ug may kasong pagpanglugos ug uno milyon pesos ang patong sa ulo niini didto sa Caraga region.
Namahayag si 4th ID commander Maj Gen Nemesio Gacal nga dili nila itugot nga mabutang sa peligro ang kinabuhi ni Corrales ug Gallardo nga mga su-od nila nga higala sa dugay nang panahon.
Gihimo sa heneral ang lakang dungan sa pagpanghimakak nga sila ang utok sa pag-red tag sa maong mga magsisibya.
Samtang gi-welcome sa National Union of Journalists of the Philippines o NUJP-Northern Mindanao ang inisyatiba nga gihimo sa militar aron mahunong na ang isy sa red-tagging sa syudad.
Miingon si NUJP Northern Mindanao president Pamela Jay Orias nga angay lamang kining masanta aron maundang na usab ang pag-akusar sa matag-usa.
Gihagit ni Orias ang gobierno nga hatagan sa tinood nga sulbad ang maong isyu aron mosamot ka lig-o ang maayong relasyon sa militar ug prensa.
Si Orias ang una nang gi-konek sa CPP-NPA pipila ka adlaw gikan sa pagkapili niini nga presidente sa NUJP.
