CAGAYAN DE ORO CITY – Naalarma si 4th Infantry Division commander Brig. Gen. Franco Nemecio Gacal sa sunod-sunod nga red-tagging nga nahitabo sa syudad.
Giangkon ni Gacal nga nahibulong siya kon nganong init ang mga sakop sa media sa syudad sa red-tagging.
Siya miingon nga dako ang iyang pagtoo nga cheap propaganda kini sa Communist NPA Terrorists aron ipag-away ang militar ug mga sakop sa media.
Gilantaw usab sa opisyal ang posibilidad nga gipaagi sa red tagging ang mga personal conflicts o ba kaha may kalabutan sa pulitika.
Dugtong niini, gipasalig ni Gacal nga mohimo sila’g imbestigasyon aron mahibal-an ang motibo ug kung kinsa man ang responsable sa red-tagging.
Samtang giawhag ni 4th Infantry Division commander Brig. Gen. Franco Nemecio Gacal ang mga nabiktima sa red-tagging nga dili mobati’g kahadlok.
Sumala ni Gacal nga kon magpakita’g kahadlok ang mga sakop sa media nga na-red tag, mas ma-engganyo ang mga responsable sa pagbuhat niini sa pagtoo nga epektibo kini nga propaganda ilabina sa mga walhong grupo.
Gani, gihupay niini ang kabalaka sa mga sakop sa media nga dili mga militar ang responsable sa red-tagging tungod kay giila nila nga kaabag sa kampaniya batok terorista ang mga miyembro sa prensa.
