CAGAYAN DE ORO CITY-Andam ang 4th ID,Philippine Army nga mo-kustodiya sa tanang masikop nga sakop sa grupong Maute,Abu Sayyaf Group ug langyaw’ng mga terorista nga kabahin sa nakig-engkuwentro sa militar sa Marawi City.
Pasalig kini ni 4th ID assistant division chief Brig/Gen Jessie Alvarez human gimando sa korte suprema nga sila ang mohupot sa mga masikop nga terorista samtang dunggon ang mga kaso niini sa mga korte dinhi sa syudad.
Gibutyag ni Alvarez nga dako nga security adjustment ang ilang ipatuman sulod ug gawas sa kampo ilabina sa dala nga peligro sa presensiya sa maong mga terorista.
Samtang pangandaman sa kapolisan ang pagbalhog ug dunggon ang kaso sa Maute nga mi-atake sa Marawi City dinhi sa syudad.
Gibutyag ni Cagayan de Oro City Police Office o COCPO spokesperson C/Insp Mardy Hortillosa nga wala pa sa ilang kamot ang opisyal nga kamanduan gikan sa korte suprema.
Gani, lakip sa ilang himoong security plan ang paghatag seguridad sa mga nahimong hurado sa maong kaso.
Una niini, gisupak sa DoJ ang sugyot nga ipahigayon sa Cagayan de Oro Courts ang pagdungog sa kasong rebelyon nga gilambigitan sa pamilyang Maute.
Samtang wala sa Court of Appeals o CA Mindanao Station ang direktang hurisdiksyon sa pagdungog sa mga kasong atubangon sa grupo sa mga teroristang Maute ug Abu Sayyaf nga nanghasi sa Marawi City.
Giangkon ni Court of Appeals Mindanao Station Executive Justice Romulo Borja nga maoy gitahasan sa pagdungog sa mga kaso sa mga terorista nga dad-on diha sa 4th ID,Philippine Army ang pipila ka korte sa syudad nga ilhon nga special courts sa korte suprema.
Si Borja miingon nga maoy partisipasyon lamang nila sa kamanduan sa korte suprema ang kabahin sa nalatid sa Human Security Act of 2007.
