CAGAYAN DE ORO CITY – Gusto na ni former army general ug karon Konsehal Romeo Calizo kinsa tsirman sa komitiba sa public safety sa konseho nga mabalhin ang lokasyon sa Camp Evangelista nga nagsilbing headquarters sa 4th ID,Philippine Army diha sa Brgy Patag padulong sa Brgy Dansolihon ning syudad.
Kini human aprobahi alang sa ikaduha ug pinal nga pagbasa ang tulo ka resolusyon sa sesyon sa konseho diin naghangyo kang Pres Bongbong Marcos ug Dept of Nat’l Defense alang sa maong katuyuan.
Miingon si Calizo nga dili na kampo tan-awon ang Camp Evangelista itandi sa ubang AFP facilities sa nasud ug peligro usab nga hingpit mabalhin gawas sa Cagayan de Oro kon malangan ang pag-okupar niini sa bag-ong lokasyon sa Dansolihon.
May isyung legal usab kabahin sa pagpanag-iya sa mga yuta sulod sa kampo gikan sa mga pribadong pamilya dinhi sa dakbayan.
Samtang kahatagan sa igong proteksyon batok sa bisan unsa nga pag-atake sa mga kaaway ang katawhan kon ipabalin ang Camp Evangelista ning syudad.
Kini ang baruganan sa majority leader sa konseho nga si Konsehal Ian Mark Nacaya kabahin sa mga resolusyon nga nagtinguha nga wad-on na ang kampo sa maong brgy ug ibalhin sa laing city govt property sa Brgy Dansolihon ning syudad.
Miingon si Nacaya nga labing maayo nga mohimo’g ‘bill sponsorships’ niini sila 1st District Cong Lordan Suan ug 2nd District Cong Rufus Rodriguez sa kamarabaha aron mas prioridad sa office of the president ug DND ang maong isyu.
